Elgoibarko Udal Musika Bandak kontzertua emango du domekan, otsailaren 5ean, eta oraingoan Iñigo Cearsolo izango da zuzendaria. Aurrez Getariako, Durangoko eta Zumarragako bandak zuzentzeko aukera ere izan du Cearsolok, baina bere herriko banda zuzentzea "oso berezia" izango dela adierazi du.

Gorka Mujikak eman dio aukera hau, eta birritan pentsatu gabe erantzun zuen baietz, eta eskerrak eman dizkio aukera hau emateagatik. Aitortu du entsegutan hasi zirenean bandaren ikuspegia erabat aldatu zitzaiola, eta errespetu handia sortzen duela bandakideen aurrean jartzeak. Dena dela, ilusio eta gogo handiz dago domekarako. Cearsolok 40 urte beteko ditu uztailean bandan, eta domekakoa urteurren horri aurreratutako oparia izango dela esan du. 12:30ean izango da kontzertua, Herriko Antzokian.

Honako pieza hauek joko dituzte domekako kontzertuan:

• Recordando a un amigo (P. Martínez)
• La gazza ladra (G. Rossini)
• Lau teilatu (J. C. Pérez- Mold. I. Urkizu)
• The Beatles in concert (Lennon-McCartney)
• Nuovo cinema paradiso (E. Morricone)

 • Dultzaineroen kalejira
Goizean, bestalde, Elgoibarko dultzaineroen diana izango da. 10:00etan hasiko da Kalegoen plazan, eta herrian zehar egingo dute kalejira.