BABESTUTAKO EDUKIA: Domekan abiatuko da Soraluzeko Blues Hotsak jaialdia 'Steve Krase & Travellin' Brothers' taldearen kontzertuarekin

Barren.eus 2022ko urr. 28a, 08:05

Soraluzeko Blues Hotsak jaialdiaren aurtengo edizioak lau kontzertu nagusi izango ditu: lehena, datorren domekan Steve Krase & Travellin Brothers-ek emango du; eta gainerako hirurak, azaroaren 17tik 20ra bitartean emango dituzte Soraluzeko Herriko Antzokian.

Gaztelupeko Hotsak disketxeak nazioarteko zein Euskal Herriko blues talde garrantzitsuak ekarriko ditu azaroan Soraluzera, Blues Hotsak jaialdiaren barruan. Steve Krase estatubatuarrak emango dio hasiera jaialdiari, domekan, arratsaldeko 19:00etan, Travellin Brothers euskal blues taldea lagun hartuta Herriko Antzokian eskainiko duen kontzertuarekin. Sarrerak 10 euroan salduko dituzte.

Gainerako hiru kontzertuak azaroaren hirugarren astean eskainiko dituzte. Azaroaren 18an (barikua), Itziar Yagüe & Paul San Martinek; azaroaren 19an (zapatua) Niko Etxart & Hapa-Hapak (iaz bertan behera gelditu zen kontzertua); eta azaroaren 20an, Carlton Jumer Smith & The Harrycane Orquestrak.
Kontzertu nagusi horiez gain, beste ekimen osagarri batzuk ere izango dira. Batetik, azaroaren 17an, kultura beltzaren inguruko 'The Black Woodstock' edo 'Summer of Soul (...Or, When the Revolution Could Not Be Televised)' dokumentala proiektatuko dute eta bestetik, azaroaren 20an Soraluzeko Musika Eskolako konboek kontzertua eskainiko dute.
 • Sarrerak salgai
Dagoeneko lehen kontzerturako sarrerak salgai daude Soraluzeko Iratxo goxodendan eta gainerako kontzertuetarakoak ere datozen egunetan jarriko dituzte salgai leku berean.

2022 10 28 soraluze blues jaialdia kartela