Eguraldi eguzkitsua lagun, festa giro handia egon da goizean Elgoibarko kaleetan.

Erraldoien Topaketan parte hartzera etorri diren erraldoiak Kalegoen plazan erakusgai egon dira eguerditik aurrera, eta makina bat ume hurbildu zaizkie gertutik ikustera. Arratsaldean hartuko dute bizia. Bien bitartean, herriko kaleetan gora eta behera ibili dira Mauxitxa txaranga eta dultzaineroak. Eta festa borobiltzeko azken zapatuko feria egon da Kalebarren plazan, aspaldiko partez txosna eta guzti gainera. Hala, jai giroa izan da nagusi herriko kaleetan.

Arratsaldean, 17:30etik aurrera, kalejiran ibiliko dira Elgoibar, Bergara, Txantrea eta Bilboko erraldoien konpartsak. Elgoibarko erraldoiak Mauxitxa txarangarekin joango dira konpartsa erraldoiaren aurrean, dultzaineroak Bergarako konpartsarekin eta Bilboko eta Txantreako konpartsek beraien musikariak eramango dituzte.

ARGAZKI-BILDUMA: Erraldoien Topaketa Elgoibarren