Aintzinako aztarnak ezagutzeko bisita gidatua antolatu dute, Urkaregitik Arnoatera

Barren.eus 2021ko urr. 5a, 12:08

Elgoibarren sorreraren 675. urteurreneko ekintzen barruan bisita gidatua egingo dute zapatuan, urriak 9, Urkaregitik Arnoatera. Mugarriak eta korta-harriak ezagutuko dituzte, besteak beste.

Pello Arrieta eta Javier Elorza historialariek eta Pedro Mari Andonegik gidatuko dute saioa, eta besteak beste ingurune horretan dauden mugarriak eta korta-harriak ezagutuko dituzte. Ingurune hori zona garrantzitsua zen Erdi Aroan, bi lurralde historikoen arteko muga zelako, eta hainbat herrik bat egiten zutelako bertan. Izenak berak dioen moduan Arnorako atea den Arnoate, esaterako, Bizkaia eta Gipuzkoa lotzen dituen mendi lepoa da; eta, Arnoate baserria hiru herriren arteko mugan dago. Markina, Elgoibar eta Mutrikuko udalerriak banatzen zituen mugarria dago Arnoate baserriaren aurrealdean. Mendarok herri izaera hartu zuenez 1983an, Arnoate Markina eta Mendaroko mugalerroan dago kokatua orain. Baserria erre baino lehen, mugarria etxebizitzaren barrualdean zegoela esaten zen eta bertakoek harrotasunez esaten zutela, Mutrikun jeizten zituztela behiak, Elgoibarren bazkaltzen zutela eta Markinan oheratzen zirela, eta guztia baserritik atera gabe. (iturria: http://neuregeografiak)

ZelaietaBurun ere geldialdia egingo dute eta 36ko Gerrari buruzko hainbat azalpen emango dituzte bertan.

Urkaregiko aparkalekuan jarri dute hitzordua, 9:00etan. Ez da izenik eman behar. Bederatzi kilometroko ibilbidea egingo dute guztira, eta antolatzaileek gomendatu dute oinetako erosoak eramateko.

2021 10 05 mugarria 3 herri arnoate baserria arg neure geografiak

2021 10 05 arnoateko mugarria

∞Lotura duten albisteak: