Gaztea Dantzan lehiaketaren finalera ailegatu zen iaz balleta ikasten ziharduen Mendaroko neska talde bat, eta aurten ere finalera iritsi da Mendaroko beste dantza talde batek aurkeztutako bideo-lana.
Gaztearen webgunean ikus daitezke finalisten izenak eta bideoak. Orain, bozketa-fasea hasi da. Hiru irabazle aterako dira fase honetan, herritarren botoei esker: lehenak 1.000 euro lortuko ditu; bigarren sailkatuak, 500 euro, eta hirugarrenak, 300 euro. Horrez gain, epaimahaiak 750 eurorekin sarituko du koreografia onena; 500 eurorekin bakarlari edo bikote onena, eta beste 500 eurorekin bideorik onena. Bozkatzeko azken eguna azaroaren 18an izango da (egun hori barne), eta egun bat geroago jakinaraziko dituzte irabazleen izenak.
- Ikusi hemen mendaroarren bideo-lana: 'Kalea mugitu, dantzatu!'
Marina Diez eta Ana Alberdi irakasleek zuzenduta honako hauek dira bideoan ageri diren dantzariak: Nerea Cueto, Arene Salegi, June Fernandez, Olatz Cinto, Naia Sorazu, Uxue Agirretxea, Goiatz Andonegi, Ane Txoperena, Naia Fernandez, Andrea Beraza, Danitza Moron, Maite Mendikute, Leire Godoy eta Janire Pampin.