Koldo Lizarralderen omenez dantzatu zuten Errosario Kaleko Amaren Eztapa-dantza

Barren.eus 2019ko urr. 8a, 11:53

Duela egun gutxi zendu zen Koldo Lizarralde gogoan izan zuten domekan egin zuten Errosario Kaleko Amaren Eztapa-dantzan. Elgoibarren XVI. mendean egiten zen dantza hau berreskuratzeko egindako lana eskertzeko omenaldia egin zion Haritz dantza taldeak, eta Errosarioko Amaren Kofradiako domina oparitu zioten Lizarralderen sendiari.

 Duela 500 urteko tradizioa da Haritz Euskal Dantzari Taldeko kideek 2009an berreskuratu zuten ezpata-dantza. Koldo Lizarralde izan zen Juan Antonio Urbeltz, Jon Lizarralde eta Jose Ignacio Sararuarekin batera, Errosarioko Amaren Ezpata-dantza berpizten lagundu zuten lagunetako bat. "Koldo Lizarralde ezinbestekoa izan da ezpata-dantza honen berpizte prozesuan, horregatik, XI. ezpata-dantza hau bere omenez dantzatu dugu, Lizarralderen hutsunea sumatu baitugu", azaldu dute dantza taldeko kideek.
Aste guztia zeruari begira pasa dute Haritz Euskal Dantzari Taldeko kideek. Iaz elizako arkupeetan dantzatu zuten ezpata-dantza, euriagatik, eta aurten berriro kaleetara eraman nahi zuten XI. ezpata-dantza. "Aurreko astean kalean egin genituen entseguak eguraldiak lagatako tarteetan egin genituen, eta bagenuen beldur pixka bat domekarako, baina, azkenean, gure dantza amaitu artean lainoetan mantendu ziren euri tantak", esan dute Haritzetik. Mezetara sartzeko zubia egin zieten agintariei, eta meza amaitu ostean, dantzari, arkabuzero eta txistulariek urteroko kalejira egin zuten San Bartolome, Kalebarren plaza eta Errosario kaleetan barrena, bidean urteroko geldialdiak eginez. Azken dantzaldia elizako arkupeetan egin zuten.

*Argazkiak: Alex Berasategi.

2019 10 06 errosario amaren ezpata dantza elgoibar arg alex berasategi

2019 10 06 errosario amaren ezpata dantza elgoibar ezpatatxiki arg alex berasategi

2019 10 06 errosario amaren ezpata dantza elgoibar arg alex berasategi taldea

2019 10 06 errosario amaren ezpata dantza elgoibar agintariegaz arg alex berasategi

2019 10 06 errosario amaren ezpata dantza elgoibar domina arg alex berasategi

∞Lotura duten albisteak: