Askotariko gaiak erabili zituzten kanturako bertsolariek. Olazabalek lau alkategairen azalean jarri zituen, esaterako, bertsolariak. EAJko alkategaia izan zen Maialen Lujanbio, EHBildurena Alaia Martin, Motxaila Talde Independentearena Amets Arzallus eta VOXena Andoni Egaña. Sagardotegira ere eraman zituen Martin, Lujanbio eta Arzallus, eta akuagim saiora Egaña, eta gaur zortzi Mendaron jokatuko den Kilimon Trail lasterketako bi parte-hartzaileren paperean ere jarri zituen Amets Arzallus eta Alaia Martin, besteak beste. Motxaila Eguneko ospakizunen maila goi-goian jarri zuten lau bertsolari puntakook, baina ospakizun egun handia gaur dute Mendaron. Goizean goiz abiatu dira Gaztetxetik Aitzbeltz kobazulora eta eguerdian bazkaria izango dute Gaztetxean. Arratsalde-iluntze partea, berriz, musikak beteko du. Nor Naiz taldearen kontzertua izango dute bazkalostean Gaztetxean eta Agosti eta Barrenarekin trikitipoteoan ibiliko dira iluntzean.