Hileroko hitzorduari eutsiz, Sinuöse kolektiboak emanaldia antolatu du barixakurako. Oraingo honetan Vigo hiritik, Galiziatik, datorren Cró! musika taldeak musikatuko du sotoa. 23:00etan hasiko da kontzertua eta hiru euroan salduko dituzte sarrerak.
Sinuösekoek jakinarazi dutenez, rocka, jazza eta bideosorkuntza uztartzen ditu talde galiziarrak. "Zuzenekoan lau musikariren fluxua eta bideo artistaren arteko komunikazio hartu-emana da, esperientzia bakar eta paregabea sortuz kontzertu bakoitzean".
Estudioan grabatutako hirugarren diskoa aurkeztera etorriko da boskote galiziarra Euskal Herrira. Pera izeneko diskoan zuzeneko inprobisazioz osatutako aurreko grabaketatik aldendu eta kolaborazioetan oinarritu dute. Estudios Brazil soinu estudio entzutetsuan grabatu dute diskoa.
• Hellgoibarko metal gaua, ekainaren 5ean
Sinuöse kolektiboak antolatzen duen Hellgoibarko Metal Gauaren hirugarren ediziorako ere gero eta gutxiago falta da. Ekainaren 5ean izango da Maalako parkean eta jaialdiko kartela osatuko duten taldeen izenak jakinarazi dituzte antolatzaileek: Wormed eta Steel Puppets. Maalako estalde berria dardarka jarriko dute.
