Espainiako Kultura Ministerioak antolatutako Maria Moliner Sarietan 50.000 biztanle baino gutxiago dituzten herrietan, irakurtzeko zaletasuna sustatzeko, liburutegi publikoek antolatzen dituzten egitasmoak saritzen dituzte. 1998. urtean hasi ziren saria banatzen eta Elgoibarko Gotzon Garate Udal Liburutegia saritu dute aurten. Errekonozimenduaz gainera, gazte-literaturako liburu-sorta bat jasoko dute saritzat.
• Erraz irakurtzea gustatzen zaigu
Erraz irakurtzea gustatzen zaigu egitasmoari esker jaso du saria Elgoibarko liburutegiak. Duela bi urte jarri zuten abian, irakurtzeko edo ulermenerako zailtasunak dituzten pertsonei laguntzeko. Eguneko Zentroko erabiltzaileekin hasi zituzten lehen saioak, baina beste kolektibo batzuetara ere zabaldu nahi dute egitasmoa. Esaterako, Zereginen Ikaskuntzarako Gelako (Z.I.G.) ikasleak ere batu dira egitasmora, eta eguaztenero elkartzen da ikasle talde bat liburutegian.
