Elgoibarko Izarrak antolatu zuen saioa, Elgoibarko Udalarekin lankidetzan eta Gipuzkoako Foru Aldundiaren diru laguntzarekin. Bertsolaritzak, euskara hutsean pentsatzen duen jardun eta mugimendu bakanetakoa izanda, bere euskalduntasunaren kontzientzian nola eragin dion azaldu zuen Lujanbiok, eta euskara biziberrituko badugu, euskara ardatzean jartzearen premiaz mintzatu zen. Politikan eta gure eguneroko jardunean euskara, sarri, “trabatik estorbura” ikusten duela esan zuen, komunikazioaren aitzakian bigarren planoan laga ohi dugula euskara; praktikotasunaren izenean, “errazkerian” jausten garela sarri, alegia. Euskara ardatzera ekartzeko saiakera txikienari “inposaketa” esaten diotenen eta komunikabideen errepasoa ere egin zuen, eta baita adierazkortasuna lantzeko premiaz ohartarazi. BARRENek hurrengo alean argitaratuko du laburpena.
