Karakate Mikologi Elkarteak hainbat ekintza antolatu ditu Jardunaldi Mikologikoen baitan. Joan den barixakuan eta zapatuan Perretxiko pintxo ibilbidean parte hartzeko aukera izan zen herriko hainbat tabernetan. Domekan, berriz, perretxikoen erakusketa jarri zuten Elgoibarko Kultur Etxeko sotoan. Gaur, azkenik, Karakateko adituek perretxikoen mundura gerturatzeko bisita gidatuak eskaini dizkiete Elgoibarko eskola umeei. Elgoibar Ikastolako eta Herri Eskolako ia 300 ikaslek jaso dituzte Inma eta Ignacio Mugerzaren azalpenak, eta euren zalantzak argitzeko aukera ere izan dute. Aranzadi zientzi elkarteko adituek batu eta identifikatu dituzten perretxikoekin osatutako erakusketa ikusi ahal izan dute sotoan.
• Mendi irteera azaroaren 12an
Perretxikoen munduan gehiago sakondu nahi dutenek Karakate elkarteak eta Morkaiko mendi taldeak elkarlanean antolatu duten mendi irteeran izango dute horretarako aukera. Azaroaren 12an izango da irteera.
