Antolatzaileek jakinarazi dutenez, Elgoibarren dauden hamar elizak egun bakarrean ikusteko “larregi” direnez, irteera bitan banatu eta urriko bi zapatutan egingo dituzte bisitaldi gidatuak: urriaren 1ean lehena eta urriaren 15ean bigarrena. Irteera hauek antolatzeko Morkaiko Mendizale Elkartearen eta beste zenbait boluntarioren laguntza izan dute.
Lehenengo irteeran sortalde-ekialdeko elizei egingo diete bisita: Azkue, Sallobente-Ermuaran, Urruzuno, San Antolin eta Maala. Bibarren irteeran, berriz, sartalde-mendebaldekoak: Santa Klara, Aiastia, Idotorbe, Sigma eta Olaso.
Irteera bata zein bestea San Bartolome elizatik abiatuko dira, 08:00etan. Bakoitzak bost ordu inguruko iraupena izango duela uste dute antolatzaileek. Eliza bakoitzean tarte txiki bat izango da atsedenerako eta gidarien azalpenak entzuteko. Hiru gidari izango dituzte bisitek.
•Hiru gidari
Inma Mugerza geologo elgoibartarrak eskainiko ditu natura eta ingurumenari buruzko azalpenak, Pello Arrietak historia eta artearen ingurukoak eta Benantxio Otaegi parrokoak erlijio bizitza izango du hizpide. Honenbestez, natura, historia eta erlijioa uztartuko dituen bisita gidatuak izango direla nabarmendu dute.
∞Lotura duten albisteak:
- Kalegoengo San Bartolome elizaren 300. urteurrena ospatzeko urte guztirako egitasmoa prestatu dute (2016-01-12)
