'Objetivo lehendakaritza' saioa prestatzen dihardu ETB-k Eusko Legebiltzarrerako Hauteskundeen harira, eta Arnaldo Otegik ere parte hartuko du. Gipuzkoako Hauteskunde Batzordeak joan den astean hartutako erabakia berretsi zuen atzo, eta horren arabera, “hautaezina” da Otegi, eta ezin izango da bozetara aurkeztu. EH Bilduk auzitara joko du eta irailaren 8an jakingo da azken erabakia.
Lehendakarigaiei eskainitako saioa irailaren 5ean eta 7an eskainiko du ETB2-k, eta gaur goizean aritu dira Arnaldo Otegirekin saiorako irudiak grabatzen. Afrika Baeta eta Julian Iantzi izango dira aurkezleak. Baetak alde politikoa jorratuko du, eta Iantzik, berriz, alde pertsonala. Otegiren bizitzaren errepasoa egingo dute, bere haurtzarotik gaur egunera artekoa. Herriko kaleetan pasiaran ikusi ditugu gaur goizean, Kalegoen plazan paletan jokatu dute Otegik eta Iantzik, Lekueder parkean ere aritu dira futbolean eta gero Izarraitz aldera joan dira. Azkenik Sallobenten bazkaldu dute.
