Euskadiko mendiko auto igoeretako zazpi probak jokatu ostean, Josemi Gabilondok eskuratu du sailkapen nagusiko lehen postua auto historikoen mailan, Alpine A110 autoarekin. Ia 40 urte daramatza Gabilondok Alpinearekin lasterketetan parte hartzen. Euskal Herriko eta Espainiako makina bat lasterketetan hartu izan du parte, eta behin baino gehiagotan lortu ditu garaipenak. 1994.urtean, esaterako, Espainiako mendiko auto igoeretako txapeldun izan zen auto historikoen mailan. Euskadiko mendiko auto igoeretako txapelketa ere dezentetan irabazi du, garaipenen kontua galduta daukala dioen arren. Hala ere, bost baino gehiago izango direla uste du.
Gabilondoren maila berean lehiatu da aurten beste elgoibartar bat, Jesus De La Fuente, hain justu ere, eta hirugarren postuan sailkatu da, Seat 124 2.0 autoa gidatuz.
•Usobiaga nagusi gazteetan
Junior mailan lehiatu da Unai Usobiaga Citroen AX Sport autoarekin, eta berak lortu du sailkapen nagusiko lehen postua. 25 urtera arteko pilotuek parte hartzen dute maila honetan. Usobiagak 2015ean hartu zuen parte estreinakoz txapelketa honetan. Euskadikoaz gainera Gipuzkoako txapelketa ere irabazi du denboraldi honetan.
