Mendiko kirolena "ia beti irudi maskulino batek ordezkatzen duen mundu bat" dela dio Jon Martinez argazkilariak. Bere ustez, emakumeak mendian egotea normala da, eskalada, alpinismoa edo mendiko eskia praktikatzen baititu haiekin.
Elkarbizitza horretatik eta emakumea bigarren mailan uzten zela ikustetik sortu zen proiektu honen ideia. Ez bakarrik existitzen direla erakusteko, baizik eta, protagonistak izateaz gain, batzuk erreferenteak direla erakusteko. Ezagutzen ez den egia eta errealitatea erakustea da Mendia emakumetasunetik erakusketaren helburua.
Martxoaren 4tik 13ra bitartean egongo da ikusgai Elgoibarko Kultur Etxeko erakusketa gelan. Gainera, argazkietako zenbait protagonistek (Sonia Casas, Ane Hernani eta Oihana Azkorbebeitia) bisita gidatua eta solasaldia emango dute, martxoaren 10ean, 19:00etan. Sarrera librea izango da, eta antolatzaileek parte hartzera gonbidatu dituzte herritarrak. Haizea Emakume Taldeak antolatu du erakusketa beste hainbat eragileren laguntzarekin.
Erakusketa astelehenetik larunbatera egongo da zabalik, 18:30etik 20:30era.
