Joan den irailaren 1ean zabaldu zuten Olaizaga Kiroldegiko igerileku berria. Inaugurazio ekitaldia egiteko asmoa zuten arren, Covid-19ak eragindako pandemiaren ondoriozko osasun egoera hobetu ahala egitea erabaki zuten. Inaugurazio ekitaldi hori abenduaren 11rako, zapaturako, iragarri zuten antolatzaileek: Elgoibarko Udala, Elgoibarko Udal Kirol Patronatua eta Elgoibarko Igeriketa Taldea.
Jaialdia berriro atzeratzea erabaki dute, azken asteetako Covid-19aren intzidentzia datuen gorakada dela-eta, "herritarren eta bereziki haurren segurtasuna bermatze aldera". Zehaztu dute aurrerago jakinaraziko dutela noiz egingo duten ekitaldi hori.