Idotorbeko igoeraren errekorra minutu erdian ondu du Iker Eskibelek

Barren.eus 2021ko urr. 12a, 14:15

Probako errekorra ontzeko helburuarekin etorri da gaurkoan Iker Eskibel (Eskoriatza, 1993) Idotorbeko Igoerara, eta bai lortu ere! 29 segunduan ondu du berak 2017an ezarri zuen errekorra.

Iker Eskibel txirrindulari eskoriatzarrak laugarren aldiz irabazi du Julian San Juanen Oroimenezko txirrindulari lasterketa, eta gainera, 2017ko ekitaldia irabazi zuenean ezarri zuen errekorra (13:17) txikitu du, hamabi minutu eta 48 segundoan igo baita Kalegoen plazatik Idotorbe gaineraino. Orain arte jokatu diren 29 edizioetan igoera 13 minututik behera osatu duen aurrenekoa da. Eta ez zen hegan egin zuen bakarra izan, lehen hiru sailkatuen hobetu baitzuten proba jokatu aurretik indarrean zegoen errekorra. Bigarren egin zuen Pello Osorok 13:03an egin zuen igoera eta 13:11ko denboran osatu zuen proba hirugarren egin zuen Mikel Perez de Obanosek. Hortaz, inoiz korritu den ekitaldirik azkarrena izan da aurtengoa.

Eskibel mendiko bizikletako lasterketetan aritzen da errepidekoetan baino gehiago azken aldian, eta esan daiteke neurria hartuta diela, afizionatuen Euskadiko Txapelketa behin baino gehiagotan irabazi baitu, azkena aurten. Joan den irailean Caja Rural BTT Kopa ere irabazi zuen Oreka taldeko txirrindulari eskoriatzarrak.

35 txirrindularik hartu dute parte Elgoibarko Lagun Taldea txirrindulari eskolak antolatutako proban, eta iazko etenaren ostean, txirrindulari gosez ziren zaleak, jende ugari batu baita bide bazterretan, bereziki azken metroetan.

ARGAZKI-BILDUMA: 2021ko Idotorbeko Igoera