Skyrunners Munduko Kopako lasterketen artean teknikoenetarikoa da Madeira Sky Race, ibilbide gorabeheratsuan eta aldakorrean jokatzen baita 55 kilometroko luzera eta 4.121 metroko desnibel positiboa duen lasterketa. Parte hartzaileek II graduko zailtasuna zuten igoerak gainditu behar zituzten, amildegi ertzetan, bai basoan eta baita itsasertzean ere, horiek baitira Madeira uharteko orografiaren ezaugarri nagusiak. Mendia, basoa eta itsasoa uztartzen dituen paisaia ikusgarriak mendi lasterketarako tokirik aproposenetarikoa egiten dute Madeira. Mayi Mujika bikain egokitu zen ingurura eta garaipen handia eskuratu zuen emakumezkoetan. 7 ordu eta 16 minutu eta 13 segundoko denbora behar izan zuen Santana herrian hasi eta bukatu zen ibibidea osatzeko. Natalia Mastrota italiarrak egin zuen bigarren (07:52:36) eta Oana Mihalcea errumaniarrak hirugarren (07:53:41). Gizonezkoetan Martin Anthamatten suitzarra izan zen azkarrena (04:45:58).
Gauzak horrela, asteburu bikaina izan da inguruotako mendi korrikalarientzat, bata bestearengandik milaka kilometrora jokatu ziren mendi lasterketak irabazi baizituzten egun berean Maite Maiorak (Hiru Haundiak) eta Mayi Mujikak (Madeira Sky Race)
