XXIV. Urrezko Banakako Aizkolarien Txapelketako finala jokatu zuten atzo, ekainak 13, Lekunberrin. Azpeitian zen jokatzekoa finala, halaxe egin baitute azken 14 urteetan, baina Nafarroan ikusleekin jokatu ahal izango zela-eta, antolatzaileek Lekunberriko Jaian Jai pilotalekura eraman zuten finala. Pandemia hasi zenetik ikuslerik gabe jokatu dituzte herri kirol txapelketak eta Lekunberrin publikoa batu zen estreinakoz harmailetan, 200 lagun (%40ko aforoa), hain zuzen ere.
Lehiari dagokionez, 45 aizkolarik hartu dute parte Urrezko Banakako Aizkolarien 24. ekitaldi honetan, eta bost kanporaketa eta bi finalerdi jokatu ostean, hiru aizkolaririk onenak sailkatu ziren finalerako: Hodei Ezpeleta mendaroarra eta Patxi Mindegia eta Oier Kañamares nafarrak.
Finalean hiru ariketa egin behar zituzten. Horietako bitan Patxi Mindegia izan zen azkarrena eta 35 segundoko aldearekin hasi zuen hirugarren eta azken ariketa, baina atzekoz aurrera eginez aurrea hartu zion Ezpeletak, eta bera izan zen lanak amaitzen azkarrena. Azken ariketan 60 ontzako lau egur moztu behar zituzten eta indar erakustaldia eman zuen aizkolari mendaroarrak (ikus emaitzak). Indarrez hustuta amaitu zuen saioa, asko sufrituta. Hori dela-eta, are hunkigarriagoa izan zen aitak, Ernesto Ezpeleta 'Bihurri'k, lanak amaitu berritan semeari eman zion besarkada. ETB1ean zuzenean eman zuten Lekunberriko herri kirol jaialdia, aizkolarien lehiaz gainera Hiru Hamarreko Harrijasotze txapelketa ere jokatu baitzuten (Nahiera atalean ikus daiteke).
Urrezko Banakako Aizkolarien Txapelketaren estreinako edizioa 1998an jokatu zuten, eta Joxe Miel Peñagarikano gailendu zen lehen ekitaldi hartan. Ondoren, aizkora munduko izen handiak ageri dira txapelketa honen palmaresean, besteak beste, Joxe Mari Olasagasti, Donato Larretxea, Floren Nazabal edo Iker Vicente. Julen Alberdi Txikia IV.a aizkolari azkoitiarra zen orain arteko azken irabazlea. Hodei Ezpeletak, baina, izen handiko aizkolari horien artean egoteari baino garrantzi handiagoa ematen dio denborei, eta hor ez du bere burua "hain goian" ikusten, proba amaitu berritan Euskal Telebistako kameren aurrean egin zituen adierazpenetan azaldu zuen moduan. Azken ariketarari, aitak eskatu moduan, ausardiaz egin ziola aurre azaldu zuen Ezpeletak, "hil ala bizi". Nekatuta bukatu arren, ahaleginak eta nekeak merezi izan zutela gaineratu zuen.
Azken ariketarari, aitak eskatu moduan, ausardiaz egin ziola aurre azaldu zuen Ezpeletak, "hil ala bizi". Nekatuta bukatu arren, ahaleginak eta nekeak merezi izan zutela gaineratu zuen. Azken egurrean aitak lanean jarraitzeko esanez harmailetatik ematen zizkion aginduak entzuten zituela aitortu zuen Hodeik. "Zama bat gehiago bizkarrera izan da aitaren ahotsa entzutea, baina ondo irten da dena".
Mendaro, Elgoibar eta Eibarko lagunak izan zituen gogoan Ezpeletak garaipenean, "nere alboan izan ditudanak, beraiek badakite zein diren. Eta, batez ere, txapel hau eskaintzen diet nire lagun handia den Dioni Cortinan emazteari, Karmele Etxaberi eta nire laguna izan den Aitor Gandiagari", adierazi zuen txapeldunak, hunkituta.
∞Lotura duten albisteak
- Hodei Ezpeleta Urrezko Banakako Aizkolari Txapelketako finalean lehiatuko da (2021-06-10)
- Galdutako plazen esperoan dira Mendaroko herri kirolariak ere (2021-04-16)
- Bigarren postuan sailkatu dira Hodei Ezpeleta mendaroarra eta Goizeder Belza Urrezko Binakako Aizkolari Txapelketan (2021-03-16)
- Datorren denboraldian aizkorako gorengo mailan lehiatzeko atarian geratu da Hodei Ezpeleta (2020-12-01)
- Hodei Ezpeleta eta Julen Larrea gailendu ziren Urrezko Binakako Aizkolari Txapelketan, 23 urtez azpikoetan (2019-03-11)
- Hodei Ezpeleta mendaroarra gailendu da Euskal Herriko Aizkolari Gazteen txapelketan (2017-12-18)