Arduradunek esan dute, Elgoibarko Udalak bat egin duela erabaki honekin, eta erabateko babesa eta adostasuna erakutsi diola atletismo taldeari.
Mintxeta atletismo taldeak hausnarketa prozesu baten ondoren hartu du datorren urteko Mugertza Krosa bertan behera lagatzeko erabakia. Beraien asmoa krosaren 78. edizioa antolatzea zen, baina horretarako zenbait baldintza jarri zituzten, eta koronabirusaren ondorioz, bi baldintza ezin direla bete nabarmendu dute: Batetik, ezingo lukete 20 urtez azpiko atleten parte-hartzea bermatu, eta kategoria absolutuetako bi probak bakarrik antolatu ahal izango lituzkete. Horrez gain, une honetan indarrean dagoen araudiak ez du baimentzen kirol proba publikoarekin jokatu ahal izatea. Bigarren baldintza honek pisu handia zeukan antolatzaileentzat: "Antolakuntzan parte hartzen dugunok uste dugu gure krosa herriarena dela, zaleena, eta ahalik eta ikuskizunik handiena eman behar dugula. Eta, mundu guztian ezaguna izanik, oinarrizkoa den zutabe hau izan ezean, ez du zentzurik lasterketa antolatzeak; izan ere, atletek ezin izango dituzte gozatu ikusleen txalo beroak, eta ezta Mintxetan egiten den jaia ere".
Krosaren antolakuntzan laguntzeko prest azaldu zaizkie herritarrak, baina egoera honen aurrean arduraz jokatzea erabaki dute: "Azken egunotan pertsona eta erakunde asko gugandik hurbil sentitu ditugu, eta krosa antolatzera animatu gaituzte. Elgoibarko krosa desberdina da, gure herriko ekitaldirik esanguratsuena, nazio mailako egutegiko probarik zaharrena, eta atletismoaren munduan murgilduta dauden pertsona gehienentzat, munduko probarik onena. Ardura oso handia genuen, gure krosa erreferente delako, eta gure antolakuntza eredu izateak ilusio handia egiten zigulako, baina gure inguruko osasun neurriak ez dira Elgoibarrek merezi duen moduko Krosa bermatu ahal izateko bezainbeste hobetu".
Eskerrak eman dizkiete erakundeei, Elgoibarko herriari, babesleei, atletei, boluntarioei, federazioei eta hedabideei eman dieten laguntza leialagatik. "2022ko urtarrilean berriz elkar ikusiko dugulakoan, gabon zoriontsuak guztioi, eta 2021erako, osasuna guztiontzat".
∞Lotura duten albisteak:
- Mugertza krosa jokatu ahal izateko bete beharreko baldintzak (2020-12-02)
- Mugertza krosak hirugarren postuari eutsi dio Espainiako krosen sailkapenean (2020-05-20)
- Obiri eta Worku izan dira azkarrenak 77. Mugertza krosean (2020-01-12)
- Inazio Izagirre eta Juan Mugertza atletak gogora ekarri dituzte, Anberesko Olinpiar Jokoetan parte hartu eta 100 urtera (2020-01-10)
- Hellen Obiri izango da izar nagusia Mugertza krosaren 77. ekitaldian (2020-01-08)
- Mugertza krosa atletismo ondarea errekonozimenduarekin sarituko du IAAFek (2019-11-04)
- Mugertza krosa hirugarren postuan da Espainiako krosen sailkapenean (2019-05-15)
- Zigor Diez: "Mugertza krosari prestigioa eta izen ona ematen dio Munduko Kros Txapeldunak Elgoibarren irabazitakoak izateak" (2019-04-02)
- Hellen Obiri eta Rhonex Kipruto nagusitasunez gailendu dira 76. Mugertza Krosean (2019-01-13)