Guztira trontza bat, lau aizkora, sega-poto bat, 24 kopa, bi plaka, hamahiru txapel, pitxer bat eta enmarkatutako argazki bat eman dizkiote Mendaroko herriari.
Esteban Elorza “Kortaberri” 16 urterekin aritu zen aurrenezkoz aizkoran jendaurrean, Zarautzen, eta harrezgero aizkora eta trontza proba garrantzitsuenetan parte hartu zuen hainbat plazetan. Ibilbide arrakastatsuaren ondorio, makina omenaldi jaso zituen, tartean jaioterrian jaso zuena 2011. urteko Kontzezio Azoka Egunean. Bi aldiz Euskal Herriko txapela irabazitako Esteban Elorza eta Agustin Larrañaga Agarretxiki trontzalari ohiak omendu zituzten Goñati pilotalekuan egindako herri kirol jaialdian. Elorza joan den apirilaren 18an zendu zen, 82 urte zituela.
Udalak aizkolariaren ilobei eskerrak eman dizkie dohaintzan emandako jabetzagatik eta jakinarazi dute Esteban Elorzaren oroimena Mendaroko herriak gogoan izan dezan kudeatuko dituztela jasotakoak.
