Oharra bidali diete antolatzaileek korrikalariei eta sare sozialen bidez ere zabaldu dute mezua. "Eusko Jaurlaritzak eta Espainiako Gobernuak aldi batez kirol ekitaldi guztiak bertan behera lagatzeko agindu dute. Are, egoerak okerrera egin dezakeela ere ohartarazi dute, eta beraz, lasterketa atzeratu beste irtenbiderik ez dugu", dio oharrak. Hamargarren edizioa zen berez aurtengoa eta apirilaren 4an zuten jokatzekoa. Dagoeneko 260 lagunek emana zuten izena. Antolatzaileek jakinarazi dute izena emana zuten korrikalariekin zuzenean jarriko direla harremanetan dirua nola itzuliko dieten zehazteko.