Elgoibarko Kirol Patronatuak jakinarazi du, hala ere, gaur zabalik egongo direla kirol instalazioak. Nolanahi ere, birusaren kontra egiteko neurriak unetik unera ari da zorrozten Jaurlaritza eta gerta daiteke datozen egunetan beste erabakiren bat hartzea.
Koronabirusa gehiago zabal ez dadin hartu dituzten neurrien artean, eskola kiroleko eta kirol federatuko partida guztiak bertan behera uztea erabaki dute Gipuzkoako Foru Aldundiak eta federazioek eta neurriak Elgoibarri eta Mendarori ere eragiten die, jakina.
Elgoibarren, gaur arratsaldean egitekoak diren eskola kiroleko entrenamendu-saioak ere bertan behera gelditu dira, eta baita zapaturako Elgoibar Ikastolak antolatuta zeukan Pilota Eguna ere bai. Morkaikok ere domekan egitekoak ziren mendi irteera ez egitea erabaki du.