Ikastolako frontoia ia beteta zegoela jokatu zituzten, San Anton Pilota Txapelketako finalak, bariku gauean. Lehen finalean promesa mailako pilotariak aritu ziren lehian. Horietako bi, Alberdi II eta Apezetxea, hirugarren aldiz ailegatu ziren finalera. Aurreko bi txapelketak, baina, elkarrekin jokatu zituzten eta bietan irabazlearen txapela jantzi zuten. Oraingoan, aldiz, elkarren aurka jokatu zuten eta ikusteko zegoen bietako noren burura joango zen txapela, hirugarren aldiz jarraian. Partida orekatua jokatu ostean, Alberdi II azpeitiarrak eta Morgaetxeberria amorebietarrak osatutako bikoteak 22-19 irabazi zuen De La Fuenteren eta Apezetxearen aurka. Alberdi II azpeitiarra aukeratu zuten finaleko pilotaririk onena, eta hala jarraian lortzen duen hirugarren txapelarekin joan zen etxera.
•Murua eta Iriondo nagusi seniorretan
Senior mailako partidan emozio gutxiago egon zen. Bikote gorriak, Ander Murua arrasatearrak eta Endika Uriondo atzelari gizaburuagarrak osatutakoak, huts gutxiago egin zuen partidaren hasieran, eta konturatu orduko alde nabarmena lortu zuten markagailuan. Iñaki Elola bidaniarrak eta Iker Mariezkurrena berriozartarrak osatutako bikotea partida berdintzen saiatu zen arren, behartu gabeko huts dezente egin zituzten eta bederatzigarren tantoan gelditu ziren. Muruari, Arrasateko aurrelariari eman zioten finaleko pilotari onenaren saria.
∞Lotura duten albisteak:
- Musika, dantza eta kirola izango dira San Anton jaietan (2020-01-16)
- San Anton Pilota Txapelketako bigarren finalerdiak jokatuko dituzte Ikastolako frontoian (2020-01-10)
- Afizionatu mailako pilotaririk onenetarikoak ikusteko aukera izango da San Anton txapelketan (2020-01-02)
- Labaka eta Telletxea gailendu dira 27. San Anton Pilota Txapelketan (2019-01-20)
- Seniorretan Alberdi-Aizpuru eta promesetan Alberdi-Apezetxea irabazle, San Anton txapelketan (2018-01-20)
- Espinal eta Zezeaga nagusi San Anton Pilota Txapelketan (2017-01-25)