Lagunak Pilota Eskolak plazara atera zuen pilota astelehen arratsaldean. Pilotari gaztetxoek zazpi partida jokatu zituzten Kalegoen plazako frontoian. Emozioz eta lehiaz beteak izan ziren partida batzuk eta umore ukitua ere izan zuen pilota jaialdiak, bi gaztek mikrofonoa hartu eta zuzenean kontatu baitzuten azken partida, Joxean Tolosarena eta Euskitzerena eginez.
Aurre benjamin mailatik infantil mailara bitarteko pilotariek jokatu zituzten partidak, banaka batzuek eta binaka besteek. Lagunak Pilota Eskolatik jakinarazi dutenez, esku pilota sustatzea eta herritarrei bistaratzea zen Lagunak Pilota Eguna antolatzeko arrazoi nagusia eta hori dela-eta emaitzarik ez zabaltzea erabaki dute.
