Eguraldia lagun, -lainotuta baina ateri eutsi dio- hamar kros lasterketaz gozatu dute 76. Mugertza krosa zuzenean ikustera Mintxetako gunera igo diren zaleek. Emakumezkoen lasterketa nagusian afrikarrak ziren faborito nagusiak eta halaxe berretsi dute Mintxetako zirkuituan. Egoera onean zegoen ibildidea, antzik ere ez iazko ibilbide lokaztuarekin. Afrikarrek Mintxetako pistako lehen zuzengunean hartu dute aurrea eta erritmo bizia jarri dute hasieratik. Laukoteak (Obiri, Chepkoech, Chesang eta Can) hartu du lasterketa burua eta Lily Partridge ingelesak bakarrik eutsi die, denbora laburrean izan bada ere. Bigarren erritmo aldaketa bortitzagoa izan da. Hellen Obirik (Kenya, 1989) erraztasun harrigarriaz laga ditu atzean Chepkoech, Chesang eta Can, eta indartsu egin du aurrera jarraitzaileekiko aldea handituz. Obirik nagusitasunez irabazi du proba. Atleta honek zilarrezko domina lortu zuen Rio de Janeiroko Olinpiar Jokoetan eta bera izan zen azkarrena iaz 5.000 metroko probetan. Distantzia horretan Munduko txapelduna ere bada. Stella Chesang (Uganda, 1996) ailegatu da bigarren postuan helmuga marrara eta Beatrice Chepkoechek (Kenya, 1991) izan da hirugarren. Obiri irabazleak moduan, Chepkoechek Diamond League txapelketa irabazi zuen iaz, eta gainera 3.000 metro oztopo-lasterketako munduko errekorra ezarri zuen 2018ko udan. Gaur hirugarren postuarekin konformatu behar izan du, Mugertza krosak emakumezkoen lasterketan izan duen maila handiaren erakusgarri.
•Rhonex Kiprutoren erakustaldia
Gizonezkoen proban 20 urteren bueltan dabiltzan hiru saltakari gazte ziren faboritoak eta aurreikuspenak bete dituzte. Hiruretan indartsuena, baina, Rhonex Kipruto (Kenya, 1999) izan da, nagusitasunez. Iazko irabazle Selemon Barega saiatu da garaipena errepikatzen, egun batzuk egin ditu Elgoibarren eta igartzen zitzaion garaipena lortzeko gogoa zuela. Tropeletik tiraka aritu da lehen metroetan, baina Rhonex Kiprutok bere legea ezarri du, hala nahi izan duenean. Bakarrik gurutzatu du helmuga marra eta hogei segundoko aldea atera dio Baregari. Kiprutok 20 urtez azpikoen munduko txapelketa irabazi zuen 2018an, 10.000 metroko proban eta Afrikako Kros Txapelketa ere irabazi zuen. Stanley Waithaka (Kenya 2000) sailkatu da hirugarren postuan. Sasoi betean ailegatu da Elgoibarrera Waithaka, Errege Egunean Zornotzako Nazioarteko Krosa irabazi baitzuen, baina gaur zituen aurkariak ez ziren edonolakoak. Bi urtean behin jokatzen den Munduko Kros Txapelketa jokatuko da aurten, martxoaren 30an, Danimarkako Aarhus hirian. Adi egon beharko da gaur Elgoibarren protagonista izan diren antxitxikariak zer egiteko gai diren ikusteko.
•Atleta Ingelesak nagusi Mamo Wolde sarian
Mamo Wolde Sariaren 17. edizioan saltakari ingelesak gailendu dira. Emakumezkoetan garaipen argia lortu du Amelia Samuelsek. Helmugan 11 segundoko aldea atera dio Holly Page herrikideari, Ingalaterrako selekzioko kideak biak. Claire Palou frantziarra sailkatu da hirugarren postuan. Gizonezkoetan ere atleta ingeles batek irabazi du Wolde saria, Zakariya Mahamedek. Eulan Brennan ingelesak egin du bigarren eta Arthur Gervais frantziarrak hirugarren.
∞Lotura duten albisteak:
- Ahalegina eta dirua emakumezkoen lasterketan jarri dute Mugertza kroseko antolatzaileek baina gizonezkoena atzean laga gabe (2019-01-09)
-
Mugertza krosa munduko bederatzi kros onenek osatuko duten IAAFeko maila nagusian izango da (2018-09-14)
-
Vicente Guineak irabazi du Mugertza krosari buruzko argazki lehiaketa (2018-05-03)
- Sebastian Coe IAAFeko presidenteak ere badu Mugertza krosari buruzko liburua (2018-01-25)
-
Jebet eta Barega gailendu dira krosaren osagai guztiak eduki dituen 75. Mugertza krosean (2018-01-14)
- Inoiz baino atleta gehiago lehiatuko dira 75. Mugertza krosean (2018-01-13)
- Mugertza krosaren iraganak eta orainak bat egin dute 75. urteurrena ospatzeko Galan (2018-01-12)
- Gazelen Hatsa’, krosaren historia, testigantzak eta irudia batzen dituen liburua (2018-01-11)
-
Goi mailako parte hartzea izango du Mugertza krosaren 75. ekitaldiak (2018-01-10)
- Elgoibar galaz jantziko da Mugertza kroseko irabazleei eta herritarrei esker ona erakusteko (2018-01-08)
- Mugertza krosak IAAF kategoriari eutsiko dio 2015-2016 kros denboraldian (2015-04-16)
- Mugertza krosak goi mailako parte hartzearekin estreinatuko du IAAF kategoria (2015-01-21)