Iker Eskibelen hirugarren garaipena jarraian Idotorben, errekorrik gabeko aurrenekoa

Pilarika Eguna jai-zubian tokatu arren, parte hartze handia izan du aurtengo Idotorbeko igoerak. 58 txirrindularik hartu dute parte (iaz 45 izan ziren) eta, eguraldia lagun, bide bazterretan ere jende asko batu da txirrindulariak animatzera. 

Lehiari dagokionez, probari neurria hartuta diola erakutsi du Iker Eskibelek (Eskoriatza, 1993), eta jarraian lortzen duen hirugarren garaipena lortu du. Aurreko bi garaipenetan (2017an eta 2016an) errekorra ontzea ere lortu zuen baina oraingoan ezin izan du. Egiten zuen haizea eta beroa ez ziren beharbada marka ontzeko baldintza aldekoenak. Hala eta guztiz, ez du marka txarra egin. Hamahiru minutu eta 47 segundoan egin du igoera, errekorretik (13:17) minutu erdira. Azkenengo metroetan lehia polita eskaini duten bi txirrindulari elgoibartarrek osatu dute podiuma. Iban Gonzalezek egin du bigarren (14:00) eta Imanol Alvarez sailkatu da hirugarren postuan (14:08).

 • Quebrantahuesos probako irabazlea nagusi Idotorben
Edizio askotan ez du emakume bakar batek ere parte hartu, baina gaur hiru emakume lehiatu dira. Amaia Urkidi izan da azkarrena, 17 minutu eta 35 segundoko denborarekin. Hala, gertu ibili arren, ez du ondu Maite Maiorak 2016an ezarri zuen errekorra (17:22). Urkidik Quebrantahuesos proba entzutetsua irabazi zuen udan eta iaz ere berak irabazi zuen Sabiñanigoko proba.

Adin tartekako sailkapenetan, Beñat Fernandez izan da onena kadete mailako txirrindularien artean. Jon Ibarluzea izan da aurreneko jubenila eta sailkapen nagusian hirugarren egin duen Imanol Alvarez izan da azkarrena 23 urtez azpikoen kategorian.

Beteranoei dagokionez, hiru sari banatzen ditu Lagun taldea Txirrindulari eskolak. Beterano gazteenen artean Jorge Gonzalez izan da onena, eta Iñigo Ortuoste eta Jon Ortuoste izan dira beste bi sarituak. (*sailkapen osoa beherago duzue)
Sari banaketaren ostean elkarrekin atera dute argazkia parte hartu duten guztiek eta Euskaraldiari babesa emateko ere aprobetxatu dute une hori.

• ARGAZKI-BILDUMA: Julian San Juanen Oroimenezko 27. San Pedroko igoera