Euskal Raid Aralar taldeak sei ordu, 55 minutu eta 44 segundokoko denbora eginda eta 102 puntu eskuratuta irabazi zuen Debabarrenako laugarren raida, Abenturetako Raiden Iparraldeko Ligako (LINRA gazteleraz) proba puntuagarria. Ainhoa Del Campok eta Silvia Irastorzak (Sagondo Raid) sei ordu, 58 minutu erta 27 segundoan osatu zuten proba eta 66 puntu lortu zituzten probetan. Talde mistoetan, Bilboko Inma Ovejerok eta Getxoko Roberto Castillok osatutako Hino Deluxe taldea izan zen onena. Elgoibartarrei dagokionez, Petrus Edam taldea osatu zuten Asier Basurto eta Beñat Bollar laugarren postuan sailkatu ziren gizonezkoen sailkapen nagusian.
Aurten Idotorben izan du irteera Morkaikok antolatutako probak. Idotorben bertan egin zuten lehen proba, eta amaitu ostean mendiko bizikletan joan ziren Arnoate baserriraino. Arnoaten bizikletak laga eta Kostolamendi inguruan argazki bidezko orientazio proba bat egin zuten. Ondoren, Arno mendikateko baso, ertz eta zelaietan barrena egin zuten trekking proba eta baita espeleologia proba ikusgarri bat ere, Basarteko leizean. Trekking proba amaitu eta gero, berriro bizikletak hartu eta Mendaroraino jaitsi ziren parte hartzaileak. Han, bikoteko partaide batek orientazio proba bat egiten zuen bitartean, beste bikotekideak hiru gol sartu behar zituen porteria batean bizikleta gainetik jaitsi gabe. Antolatzaileek azaldu dutenez, gutxik lortu zituzten gol denak sartzea, eta puntuak eskuratzeko lokotx biltzea, saku lasterketa eta arraultza lasterketa bezalako probak egin behar izan zituzten. Mendarotik Elgoibarrera itzuli ziren parte hartzaileak, Mintxetan amaitu behar baitzuten raida, 17:00etarako. (ikus sailkapenak)
• 82 lagun familientzako raidean
Iaz moduan, familian egiteko raida ere antolatu zuen Morkaikok. 82 lagunek hartu zuten parte. Talde bakoitzak antolatzaileek Idotorbeko hainbat lekutan jarri zituzten balizak topatu behar zituzten mapa bat erabiliz. Aubixan, slackline eta eskualoi proba bereziak egin ahal izan zituzten eta San Pedro baseliza ingurura bueltatzean, Hiru txirlo, norabideetan oinarrituriko mikroorientazio eta mendiko bizikletako proba bereziak ere egin zituzten haur eta gurasoek.
Bi ordu etrta erdi inguruko bilaketa, joko, lasterkaldi eta orientazio momentu dibertigarri ugariren ondoren, probaren inguruko komentario eta bitxikeria guztien inguruan berba egiteko aukera izan zuten amaieran, Morkaikokoek eskainitako mokadutxoen inguruan batuta.
*Argazkiak: Manu Sanchez.
∞ Lotura duten albisteak:
- Larrinaga-Intxaurrandieta eta Del Campo-Irastorza bikoteak gailendu dira Debabarreneko hirugarren raidean (2017-05-06)
- Gaizka Agirre eta Aaron Garmendia irabazle Debabarrena raidean eta Lariz eta Irazabal elgoibartarrak bigarren (2016-09-27)
- 37 bikotek hartu zuten parte Debabarreneko estreinako raid-ean (2015-09-28)