Euskadiko Atletismo Txapelketan urrezko hiru domina lortu ostean, -Sasiainek bi eta Hernandezek bat-, Mintxetako bi ordezkariek Espainiako Atletismo Txapelketan lehiatu dira. Finalerdiak jokatu ziren lehen jardunaldian, zapatuan. Nerea Sasiainek bere serieko bigarren postua eskuratu zuen 400 metroko lasterketan, eta eginiko denborari (56,77) esker lortu zuen finalerako sailkatzea. Laura Centella kataluniarrak irabazi zuen seriea 56,76ko denborarekin, Sasiainek baino ehuneko bakar bat gutxiago eginda. Bere marka pertsonala izateaz gainera, pista estaliko Euskadiko errekorra ere bada denbora hori, 20 urtez azpikoetan. Eta ez hori bakarrik, denboraldiko Euskadiko markarik onena da senior mailako antxitxikariak ere kontuan hartuta.
• Europako marka onena
Domekan jokatu zuten finalak sekulako maila izan zuen. Andrea Jimenezek irabazi zuen proba, eta 54,26ko denborarekin Espainiako errekorra ondu zuen. Hala, Avilako antxitxikariak joan den urtarrilean berak ezarritako errekorra ondu zuen. Espainiako errekor berria denboraldiko Europako marka onena ere bada, eta munduko hirugarrena 18 urtez azpiko atleten artean. Carmen Aviles andaluziarrak egin zuen bigarren (55,53) eta Laura Centellak hirugarren (56,05). Nerea Sasian sailkatu zen laugarren postuan, 56 segundo eta 87 ehuneko denbora eginda. Finalera sailkatzea zen Sasiainen helburua eta podiumera igotzeko gutxi falta izan zitzaion. Denborari dagokionez, 57 segundotik jaistea zuen helburutzat eta bi alditan lortu zuen, finalerdietan eta finalean.
• Martin Hernandez finaletik kanpo
Martin Hernandezek 800 metroko lasterketan hartu zuen parte Antequeran. Zapatuan, finalerdietako seriean lehiatu zen eta laugarren postuan sailkatu zen 1.58,53ko denbora eginda. Finalera sailkatzetik zortzi ehunekora gelditu zen, bere serieko lehen hirurak sailkatu baitziren finalerako. Bere marka pertsonaletik lau ehunekotara gelditu zen Mintxetako antxitxikaria.
∞ Lotura duten albisteak:
-
Urrezko bi domina Nerea Sasiainentzat eta beste bat Martin Hernandezentzat Euskadiko Txapelketan (2018-02-26)
- Lau domina eskuratu dituzte Mintxetako atletek Gipuzkoako txapelketan (2018-02-20)
- Nerea Sasiainek Gipuzkoako errekorra ondu du 400 metroko lasterketan (2018-02-12)
- Nerea Sasiain eta Martin Hernandez atletak Euskadiko txapeldun (2017-05-30)
- Martin Hernandezek zazpigarren postua lortu du Pista Estaliko Espainiako Gazte-mailako Txapelketan (2017-03-13)
-
Nerea Sasiain eta Martin Hernandez Gipuzkoako txapeldun atletismoan (2017-02-02)
-
Martin Hernandez txapeldunorde pista estaliko Espainiako atletismo Txapelketan (2016-03-14)