Nora Kortaberri Bilbao elgoibartarrak Munduko txapelketa jokatzeko azken deialdian egoteko itxaropenak zituen arren, atzo jaso zuen baieztapena. "Espainiako selekzioarekin prestaketa partida batzuk jokatu nituen joan den astean, eta egia esan ez nuen nire mailarik onena eman. Hortaz, ez neukan erabat argi deituko ninduten ala ez, baina atzo jakinarazi zidaten eta poza emjan dit berriak, Munduko Txapelketa bat jokatzeko aukera izatea handia baita". Espainiako hautatzaile Sagrario Santanak hamasei jokalari deitu ditu, tartean zazpi euskal herritar. "Une honetan hemen dugun maila erakusten du horrek. Gainera, berezia izango da txikitatik aurkari izan ditudalako ondo ezagutzen ditudan euskal jokalariekin batera Munduko Txapelketa bat jokatzea", azaldu du Kortaberriak.
Errusiako hiriburu Moskun jokatuko da junior mailako mundiala, uztailaren 2tik 15era bitartean. Espainiako selekzioa ekainaren 19an hasiko da mundiala prestatzen, Guadalajara egingo duten kontzentrazioan, eta uztailaren 1ean joango dira Errusiara. Hortaz, Kortaberriak hilabete inguru egin beharko du etxetik kanpo.
C Multzoan lehiatuko da Espainia, Errumania, Alemania, Kazakhstan, Argentina eta Egiptorekin batera. Espainiak Argentinaren aurka jokatuko du estreinako partida, uztailaren 3an.
Denboraldi amaiera gazia izan da Kortaberriarentzat, Ohorezko Mailari ezin izan diolako eutsi Aiala Zarautz eskubaloi taldeak.
- Irakurri hemen Nora Kortaberriak BARREN aldizkariari eskaini zion elkarrizketa (987 zenb. 2016-04-08 -PDF-)
∞Lotura duten albisteak:
- Munduko Txapelketarako sailkapena lortuta itzuli da Nora Kortaberria Poloniatik (2016-02-21)
- Nora Kortaberriak Munduko Txapelketako sailkatze fasea jokatuko du Polonian Espainiako Selekzioarekin (2016-03-16)