San Bizente Eguna da urtarrilaren 22a, eta ohitura duten moduan San Bizente-San Roke ermitaren bueltan ospatuko dute Azkueko auzotarrek.

San Bizenteko hotza, neguaren bihotza dio esaera zaharrak, tradizioaren arabera neguko hotzena izaten delako egun hau, neguko bihotza. Aste honetako eguraldia ikusita arrazoia eman behar esaerari. Domekarako ere hotza iragarri dute. San Bizente-San Roke ermitan egingo duten mezarekin hasiko dute San Bizente eguna, 10:00etan. Prozesioan aterako dute sainduaren irudia eta meza ospatu ostean, auzotarrek elkartea zabaldu eta salda eta txorizoa banatuko dituzte gerturatzen direnen artean.