1950eko hamarkadara arte, gutxienez, gure herri eta eskualde gehienetan bizirik iraun zuen ohitura izan zen, eta ohikoa zen, esaterako, kalabazak edo arbiak hustu eta aurpegi itxura ematea. Barruan kandela txiki bat sartu eta bide bazterretan jartzen ziren argiztatuta, bizilagunak beldurtu eta hildakoen arimei bidea erakusteko. Horrelako tradizioak berreskuratu nahi dituzte Elgoibarren eta Mendaron, eta horretarako elkartu dira hainbat eragile. Elgoibarren, Atxutxiamaika, Ludoteka, Gaztelekua, Liburutegia, Haritz dantza taldea eta Musika Eskola aritu dira ekitaldiak antolatzen Udalarekin elkarlanean, eta Mendaron, berriz, Udal Ludotekak eta Gaztelekuak eta Arno Guraso Elkarteak antolatu dituzte ekintzak.
