Uztailaren 27an, larunbatez, ospatuko dute Mendaron Kuadrilla Eguna, eta urtero legez, paella lehiaketa egingo da frontoian (arroza, oilaskoa, olioa eta gatza Udalak jarriko ditu). 12:30ean hasiko dira paellak prestatzen kuadrillak, eta 14:30ean batuko dira denak mahaira. Paella lehiaketarako, baina, izena eman behar da, igandea (uztailak 14) aurretik, Uztargi, Menditxo eta Aitz Beltz tabernetan. Pertsonako bost euro ordaindu behar dira.
• Zahartzaroari omenaldia uztailaren 28an
Umeen eta nagusien eguna ospatuko dute uztailaren 28an Mendaron, eta egun horretan, ohi legez, adinekoak omenduko dituzte. 70 urtez gorakoentzako bazkaria da [senar-emazteetako batek 70 urte izatea nahikoa da bazkarirako]. Lagun Betikoak tabernan edota Coviran, Roteta eta Mariaxun dendetan eman behar da izena uztailaren 16a aurretik. Aizpe elkarteak antolatzen du bazkaria, Mendaroko Udalaren babesarekin.
• Danborradetarako entseguak
Uztailaren 25ean egingo da helduen danborrada, Santio Egunez, eta umena, uztailaren 27an. Nagusien danborradarako entseguak uztailaren 8an hasi ziren, baina oraindik gelditzen dira beste bi: uztailaren 15ekoa eta 17koa. 21:00etan izaten dira nagusien entseguak, frontoian. Umeen danborradarako entseguak, berriz, astelehenean hasiko dira, eta hiru egunetan egingo dira: uztailaren 15ean, 18an eta 22an. 19:30ean izango dira, frontoian. LH1etik LH6ra arteko umeek har dezakete parte.