Motel esnatu da eguna, eta aurreko urteetan baino jende mugimendu apalagoa zebilen 11:00ak aldera, baina eguerdirako hasi dira Kalegoen plaza eta inguruak itxuratzen eta jendez betetzen. Euri tanta batzuk ere egin ditu goizean, baina atertu du zorionez, eta jairako aitzakiarik ez da une honetan Elgoibarren. Goizean, Limousin lehiaketa, gazta lehiaketa eta sagardo lehiaketa egin dira, eta arratsaldean, Mintxetaren oroimenezko San Bartolomeetako XX. harri-jasotze txapelketa, Xarivai zirkoa eta Mariatxien kalejira izan ditugu. ARGAZKI BILDUMA BARRUAN
Gazta lehiaketan, Aiako Odriozola gaztandegikoek eraman dute txapela eta sagardo lehiaketa Andoaingo Gaztañaga sagardotegikoek irabazi dute. Harrijasotzen, berriz, Mikel Lopategi 'Urra' 21 urteko harrijasotzaile zarauztarra gailendu da. Belaustegi harria zortzi aldiz jaso du Lopategik, eta Mintxeta harria 16 aldiz. Guztira, 24 jasoaldi egin ditu Urrak. Haren ondoren sailkatu dira Galarraga eta Kortaberri, guztira 23 eta 22 jasoaldi eginda hurrenez hurren. Hamar jasoaldi egin ditu Galarragak Belaustegi harriarekin eta hamahiru Mintxeta harriarekin. Kortaberrik, berriz, bederatzi aldiz jaso du bata, eta hamahiru aldiz bestea.
