Benantzio Otaegi apaiza omenduko dute Sanmigeldarren egunean

Barren.eus 2016ko eka. 17a, 11:38

Aiastia-San Migelen auzotarrek beraien eguna ospatuko dute zapatu honetan, ekainaren 18an. aurten Benantzio Otaegi apaizak jasoko du sanmigeldarren omena. Era berean, Urruzunon ere zapatuan ospatuko dituzte auzoko jaiak. 

Sanmigeldarren eguneko ospakizunak auzoko baselizan egingo duten mezarekin hasiko dira 11:00etan. Ondoren, salda eta txorizoa banatuko dituzte. Bazkaria 14:30ean izango da eta bazkalostean omenaldia, aurten San Bartolome parrokiako Benantzio Otaegi apaizak jasoko du Sanmigeldarren omena. Jaia dantzaldi batekin borobilduko dute Elustondo anai-arreben trikiti doinuz lagunduta.

•Urruzunoko jaiak, zapatuan

Aiastia ez  da jai giroan murgilduko den Elgoibarko auzo bakarra izango asteburu honetan. Urruzunon auzoan ere festak ospatuko dituzte. Auzoan hildakoen omenez meza izango da zapatuan, 17:30ean, eta ondoren mokadutxoa banatuko dute. 19:00etan Trialsin erakustaldia hasiko da. Iluntzean, azkenik, afaltzeko batuko dira guztiak auzoko gastronomia elkartean. Auzokoentzako ez ezik kanpotik joaten direnentzako ere egingo dute lekua soziedadean, antolatzaileek jakinarazi dutenez. Xabier eta Ekain trikitilariek alaituko dute eguna.