Birgaitze lanak lizitazio fasean daude orain eta zehazki San Roken, 26 zenbakitik Juan Mugertza 3ra doan tartea, eta Trenbide kalean, San Ignazio 4 eta Ubitate 3 peoren ondoan dagoen espaloia dira Udalak berrituko dituenak. Oinarrizko lizitazio prezioa 111.177,52 eurokoa da (BEZ kanpo). Kale tarte horietako espaloiak konpondu eta zabalduko dituzte, irisgarritasuna hobetu, oinezkoei lehentasuna eman eta herritarrei espazio atsegin, irisgarri eta seguruagoak eskaintzeko helburuarekin. Lanek bi hilabeteko iraupena izango dute eta datozen hilabeteotan burutzea da Udalaren asmoa.
Aipatu kaleen birgaitzeak Irisgarritasun Planean hautemandako beharrei erantzuten dietela zehaztu dute Udaletik. "Herriko irisgarritasuna hobetzea eta elgoibartar guztiei egokitutako espazio atsegin, irisgarri eta seguruak eskaintzea Elgoibarko Udalaren lan ardatz nagusietako bat da", azaldu dute.