Mari Domingi sorgintzat hartu zuen gaizkile batek zakua lapurtu zion Olentzerori, eta haren bila jardun ziren ordu t'erdi inguruko emanaldian, Mari Domingi bera, Olentzero eta Galtzagorri. Antzerki musikatua izan zen eta gogotik gozatu zuten familiek. Domekan, berriz, erabiltzen ez zituzten jostailuak trukatzen jardun ziren Mendaroko haurrak Mañuskako etxeen aterpeetan. Arno Guraso Elkarteak sortu zuen ekimena, estreinako aldia zen egiten zutena eta arrakasta izan zuen ekimenak. Aurrez, bi egunez, opariak batzen jardun ziren Arnoko Ekintzak taldekoak Ikastolan eta Herriko Enparantzan, eta jakinarazi dutenez, 63 familia inguruk eman zituzten jostailuak trukerako. Ekimenak izan duen arrakasta ikusita, aurrerantzean trukerako ekintza gehiago egitea aztertzen ari direla aurreratu dute antolatzaileek.
