IMH eta Meka ikastetxeetan minutu bateko isiluneak egin dituzte joan den barixakuan zendu ziren Ingeniaritza Dualeko IMHko bi ikasleen oroimenez, eta haien familiei babesa adierazteko. Ikastetxera bidean zetozela, Eibarko saihesbidean izandako istripuan galdu zuten bizia Alberto Soto Ezkurdia eta Eduardo Piñol Merino ikasleek, 23 urtekoak biak. Haien ikaskide Iker Jimenez Vidal donostiarrak zauri larriak izan zituen, eta azken orduetan bere kasa arnasa hartzen hasi bada ere, oraindik egoera kritikoan jarraitzen du. Ikaskidea ahal den bizkorren osatzeko nahia ere adierazi dute gaur goizean egin dituzten isiluneetan. Txalo zaparrada batekin amaitu dira minutu bateko isiluneak.
