Familien arteko harrera egitea da egitasmoaren helburua eta euskara eta aniztasuna oinarri hartuta, berez sortzen ez diren bizikidetzarako espazioak ahalbidetzea. "Elkarren arteko ezagutza sustatu, kultura partekatu... edozein aitzaki bilatzen dogu kalitatezko denbora bat elkarrekin pasatzeko", azaldu du Ayestak. Egitasmoak bi urte daramatza martxan Elgoibarren, eta hilean birritan batzen dira familiak Auzoko egitasmora. "Familiei eurei lagatzen diegu plana aukeratzen, baina gastronomiaren bueltakoek dute arrakasta handiena. Horrez gain, Elgoibarko txoko desberdinak elkarrekin ezagutzen saiatzen gara. Elgoibarren dauden hiru museoak ezagutu, Lizagasagar sagarokixa, naturguneak... eta plan informalagoak ere egin ditugu orain arte".
Egitasmoak berari eman dionaren gainean ere berba egin du Ayestak. Lagun desberdin asko egiteko aukera eman dion zeregina izateaz gainera, asko ikasi duela nabarmendu du, hazten lagundu diola. "Izugarria izan da, familia ere sartu dut tartean, benetan aberasgarria iruditzen zaidalako herriko kultur aniztasuna eta hizkuntza desberdinak ezagutzea, eta auzokoekin harreman sakonagoak izateko aukera izatea. Euren bizipenak jaso eta bizi duten errealitatea hobeto ezagutzea herria hobeto ezagutzeko bidea baita". Familiengandik jaso dituen balorazioei dagokionez, euskaratik urrun dauden hainbat familiek harrerarako espazio bat moduan ikusten dute Auzoko Familiak. Era berean, herriaz duten ezagutza handitzeaz gain, Elgoibarren jaioak diren pertsonekin harremantzen hasteak, kalean kaso egiteko gelditzeak, esaterako, ikusgarriago egin dituela uste dute. "Emozionantea da. Aurreiritziak apurtu eta pertsonak gertuagotik ezagutzeko balio dien egitasmoa dela ere aipatzen dute".
Gurasoen premiak asetzeko gunea den guraso.eus weborrian entzun dezakezue Gorane Ayestari eginiko elkarrizketa. (BARRENek ere eskaini zion erreportajea Auzoko Familiak egitasmoari)
- Hemen entzun dezakezue: https://guraso.eus/gorane-ayesta
Gogoratu Auzoko egitasmoa martxan duten herri guztietako partaideak Elgoibarren elkartuko direla domekan, 'Auzoko jaia' festan.
∞Lotura duten albisteak:
- Elgoibar kultura eta hizkuntza aniztasunaren elkargunea izango da Auzoko egitasmoaren jaian (2023-05-31)
- 'Auzoko familiak' Mufomi fosil eta mineralen museoan izan dira (2023-01-30)
- Azaroan hasiko da 'Auzoko Familiak' egitasmoa (2022-10-18)
- Elkarbizitzarako zubia, euskaratik (2022-11-12)