Lankidetzan antolatu dute gaurko protesta-ekitaldia Mendaroko Tratu Onen Aldeko Taldeak eta Dantza Modernoko ikasleek. 19:00etarako deitua zuten manifestazioa, baina aurrez, plazan, Izaroren 'Libre' kantua dantzatu dute dantza modernoko 50 bat ikaslek. Ondoren, herri osoan zehar egin dute manifestazioa. 'M8 egunero da. Berdintasuna helburu' pankartak zabaldu du manifestazioa, eta atzetik, dozenaka herritar joan dira, mugimendu feministaren ikurrak hartuta horietako zenbait. Herriko Enparantzan hasi, Garagartza auzoa pasatu, eta Mendarozabaletik barrena Azpilgoetara iritsi dira manifestariak. Han, bukaeran, Maialen Lujanbioren bertso bat kantatu dute, Euskal Herriko Bertsolari Txapelketa Nagusian txapeldunak kantatu zuen agurreko bertsoa, eta txalo-zaparrada handi batekin amaitu dute protesta. ARGAZKI BILDUMA
