Elgoibarko Udalak Sallobenten hiru emakumeri egindako erasoa gaitzesteaz gainera, elkartasuna adierazi zien emakumeei eta haien hurbilekoei, erasoa gertatu biharamunean. Era berean, Lila Elgoibarko Emakumeen Etxeak elkarretaratzera deitu zituen atzo herritarrak, erasoaren aurrean sentitzen duten "haserrea eta gaitzespena" plazaratzeko.
Buruan zauritutako emakumeak dagoeneko alta jaso duela jakinarazi dute Elgoibarko Udaltzaingotik. Ertzaintzako prentsa bulegotik jakitera eman dutenez, erasotzailearen aurkako salaketa jarri dute emakumeek, eta atxilotu ostean epailearen aurrean deklaratzera eraman zuten. Epaileak aske lagatzeko agindu zion Poliziari eta hurrengo egunean kalean zen erasotzailea. Auzia etorri bitartean, epaitegi batean sinatu beharko du hamabost egunean behin.
