Eibarko ertzain-etxeak joan den urriaren 26an jarri zuen martxan landa-patruila. Harrezkero, herritarrak babesteko unitateko agenteak Debabarreneko landa-ingurua patruilatzen ari dira, uniformea jantzita eta Ertzaintzaren bereizgarriak dituzten ibilgailuetan. Herriguneetatik aldenduta bizi diren herritarrei Ertzaintzaren zerbitzua gerturatzea da patruila horien zeregin nagusia. Eibarko ertzain-etxeak jakinarazi duenez, baserrietara eta isolatutako etxeetara bisitak egingo dituzte ertzainek, eta bizilagunekin berba eginez, izaten dituzten arazoak antzeman eta konpontzea izango da euren helburua.
Landa-inguruko patruila, gainera, Gipuzkoako eta Bizkaiko foru-aldundietako basozainekin lankidetzan arituko da, herritarrei zerbitzu eraginkorragoa emateko asmoz.