Eusko Jaurlaritzako Osasun Sailak eguneratu egin du azkeneko hamalau egunetan 100.000 biztanleko 400 kasu baino gehiago dituzten udalerrien zerrenda. Azkenekoz joan den astelehenean eguneratu zuen zerrenda hori Jaurlaritzak, eta biharamunean sartzen da indarrean. Hamar udalerri gehiago itxita egongo dira bihartik aurrera, baina horien artean ez dira egongo Elgoibar eta Mendaro. Eremu horian zegoen Gipuzkoako herri bakarra zen Elgoibar eta eremu laranjara igo da orain, 311,96ko intzidentzia-tasa baitu. Gipuzkoan Elgoibar eta Beasain dira eremu laranjan dauden 5.000 biztanletik gorako udalerri bakarrak. Gainerakoak eremu gorrian daude, itxita (ikus Gipuzkoako mapan).
Mendarok 400eko maila gainditzen duen arren, -425,53ko intzidentzia du-, ez dago itxiera perimetrala ezarri beharko duten udalerrien zerrendan. Izan ere, hiru baldintzetatik bi betetzen ditu Mendarok: 400dik gorako intzidentzia izatea eta kasu positiboen kopurua azken 7 egunetan 4 baino gehiago izatea (7 kasu zenbatu dituzte). Baina, ez du hirugarren irizpidea betetzen, alegia, azken 14 egunotan Covid-19aren kasu positiboen intzidentzia-tasa metatua udalerriari dagokion oinarrizko osasun-eremuan 400ekoa edo handiagoa izatea 100.000 biztanleko. Eskualdean bertan, Mallabiak Mendarok baino intzidentzia baxuagoa duen arren, itxiera perimetrala ezarri beharko dute, aurrez aipaturiko hiru irizpideak betetzen dituelako.
• Hona Debabarrenako asteburuko datuak, herriz herri (apirilaren 23tik 25era):
- Deba +22 (6 barikuan 11 zapatuan 5 domekan) 1723,82
- Soraluze +6 (3, 1, 2,) 654,25
- Eibar +20 (7, 4, 9,) 582,37
- Mutriku +7 (5, 0, 2,) 564,55
- Ermua +15 (5, 4, 6,) 518,13
- Mendaro +2 (1, 1, 0,) 425,53
- Mallabia 0 420,17
- Elgoibar +6 (2, 3, 1,) 311,96
- GIPUZKOA: +1004 (358, 290, 356) 726,48
Arabako, Bizkaiko eta Gipuzkoako 5.000 biztanletik gorako 50 udalerri daude zerrenda gorrian, eta 5.000 biztanletik beherako 20 herritan ezarriko dituzte eremu gorriko udalerriei dagozkien murrizketak
∞Lotura duten albisteak:
- Beste bost positibo eta intzidentzia-tasa gora Elgoibarren ere (2021-04-22)
- Gipuzkoako 5.000 biztanletik gorako herri bakarra dago eremu gorritik kanpo: Elgoibar (2021-04-21)
- Eskualdeko intzidentzia-tasa baxuena du Elgoibarrek, 268,63koa (2021-04-20)
- Itxiera perimetrala ezarri dute Gipuzkoa, Araba eta Bizkaian eta gora egiten jarraitzen du ospitaleratutakoen kopuruak (2021-04-19)