Herritarren biltzeko eta mugitzeko eskubidea are gehiago mugatu ditu Jaurlaritzak koronabirus pandemiaren hirugarren olatuari aurre egiteko helburuarekin. Hala, urtarrilaren 25etik indarrean diren azken neurriei buruzko ohiko galderen erantzunak jasotzen dituen dokumentua eguneratu du Jaurlaritzak.
Zenbat laguneko taldeetan elkar daitezke herritarrak?
Gehienez lau laguneko taldeetan, eremu publikoan zein pribatuan, leku itxietan zein irekietan. Eskoletan eta lantokietan talde handiagoetan elkar daitezke, tokian tokiko protokoloak errespetatuta. Baimendutako kirol jardueretan ere sei lagunera arteko taldeetan elkar daitezke.
Etxeratze aginduak indarrean jarraitzen al du?
Bai, 22:00etatik 06:00etara ez dago kalean ibiltzerik.
Atera al daiteke maskota 22:00ak ondoren?
Ez.
Atera al daiteke norberaren bizileku den udalerritik?
Ez, ez bada hezkuntza, lan, zaintza eta osasun arrazoiengatik. Abian diren kirol lehiaketetan parte hartzen duten kirolariak ere atera daitezke herritik lehiatzera eta entrenamenduetara joateko.
Atera al daiteke Arabako, Bizkaiko eta Gipuzkoako mugetatik?
Ez, ez bada justifikatutako arrazoiengatik.
Beharrezkoa al da irteera horiek justifikatzeko agiriren bat izatea?
Oso komenigarria da.
Nola justifikatu daiteke beste udalerri batera joateko arrazoia adinekoen edo adingabeen zaintza dela?
Egiaztagiriren batekin. Izan daiteke familia lotura frogatzen duen agiriren bat, zaindu behar duen pertsonaren identifikazio datuekin batera, edo zaintzailearen erantzukizunpeko adierazpen bat, artatuko duen pertsonaren helbidea eta telefonoa zehaztuta.
Udalerritik ateratzeko debekuak udalerri guztietako herritarrei eragiten al die?
Bai, berdin dio zerrenda gorrian dagoen udalerri batekoa izan ala ez. Gaurtik udalerri guztietako sarrera-irteerak daude itxita.
Joan daiteke alboko herrira jarduera fisikoa edo kirola egitera edo mendi buelta bat ematera?
Ez. Ezin zara zure udalerritik irten kirol jarduera fisikoa aire zabalean egiteko, Covid-19ko kasu positiboen intzidentzia-tasa metatua edozein dela ere.
Kendu al dezaket maskara, bakarka, hiri-inguruetan kirola egiten dudan bitartean?
Kirol-jarduera orotan, nahitaez erabili beharko da maskara. Hauek dira salbuespenak: eremu naturaletan, hirigune periferikoetan (oinezkorik gabe), igerilekuetan, lehiaketa profesionalean edo erdi-profesionalean dauden taldeen entrenamenduetan, lehiaketetan eta kanpoan egiten den jarduera fisiko biziko aparteko uneetan.
Joan daiteke alboko herrira erosketak egitera?
Soilik norberaren herrian ez dagoen produktu edo zerbitzuren bat eskuratzeko, eta beti gertueneko tokira.
Norberaren udalerriko supermerkatua txikia bada, joan al daiteke alboko herrikora erosketak egitera?
Soilik herrian ez dagoen produktu edo zerbitzuren bat behar denean.
Joan daiteke alboko herriko ileapaindegi batera?
Soilik norberaren herrian ileapaindegirik ez badago.
Joan daiteke alboko herrira kontzertu batera edo trago bat hartzera?
Ez.
Norberaren udalerriko tabernak itxita badaude, joan al daiteke alboko herrira kafe bat hartzera?
Ez.
Joan daiteke beste herri batera bilobak bisitatzera?
Bisitatzera ez, zaintzera bai.
Joan al daiteke beste lurralde batera norbait aireportura edo tren edo autobus geltokira eramatera?
Bai.
Nafar batek har al dezake Hondarribiko aireportutik abiatzen den hegaldi bat?
Ez; Araba, Bizkaia eta Gipuzkoa zeharkatu ditzake, baina ezin du inolako jarduerarik gauzatu.
Joan al daiteke beste udalerri batera hango animalia batzuei jaten ematera?
Bai.
Joan al daiteke beste udalerri bateko hil beila edo hileta batera?
Hil dena bigarren mailara arteko senidea den kasuetan bakarrik.
Joan al daiteke Arabako, Bizkaiko eta Gipuzkoako mugetatik kanpoko bigarren etxebizitzara?
Ez.
Joan al daiteke beste udalerri bateko bigarren etxebizitzara?
Ez.
Baimenduta al dago adinekoen egoitzetara joatea?
Bai, zentroak berak baimendutako bisitak badira.
Baimenduta al daude espetxeetako bisitak?
Bai, Espetxeetako Agintaritzak emandako baimena izanez gero.
Ostalaritzako establezimenduek ireki al ditzakete ateak?
Jaurlaritzaren zerrenda gorrian ez dauden udalerrietakoek bakarrik.
Zein udalerri sartzen dituzte zerrenda gorrian?
5.000 biztanletik gorakoetan, hamalau eguneko 100.000 biztanleko intzidentzia tasa 500etik gorako dutenak. 5.000tik beherakoetan, herriko egoeraz gain osasun-eremuko egoera ere hartzen dute kontuan. Zerrenda hori astelehen eta ostegun eguerdiro berritzen du Jaurlaritzak, eta hurrengo egunean sartzen da indarrean.
Ostalaritza irekita duten udalerrietan, ze ordutegi dute tabernek eta jatetxeek?
20:00etarako ateak itxi behar dituzte, eta ezin dituzte ireki 06:00ak aurretik. 21:00ak arte etxera eramateko eskaerak prestatzen jarraitzeko aukera dute, eta 22:00ak arte etxera eramateko zerbitzua eskain dezakete.
20:00ak bitartean zer zerbitzu eskain dezakete?
Terraza zerbitzua, %100ean, eta barrualdekoa edukiera erdira murriztuta. Bezeroek mahaietan eserita bakarrik kontsumitu dezakete, gehienez lauko taldeetan, eta sekula ez barran.
Zer zerbitzu eskain dezakete zerrenda gorrian dauden udalerrietako ostalaritza establezimenduek?
Eramateko eskaerak presta ditzakete 21:00ak arte, eta etxez etxeko banaketa egin 22:00ak arte.
Joko eta apustu etxeek ireki al ditzakete ateak?
Intzidentzia tasa 500etik beherakoa den udalerrietakoek bakarrik. 20:00etarako ateak itxi beharko dituzte eta ezingo dituzte ireki 06:00ak arte. Bezeroek eserita egon beharko dute uneoro.
Baimenduta al dago ostalaritza establezimenduetako jolas eta apustu makinetan ibiltzea?
Bai, baina beti eserita.
Eskola kirola baimenduta al dago?
COVID-19aren kasu positiboen azken 14 egunetako intzidentzia-tasa metatua 100.000 biztanleko 500 baino gutxiagokoa duten udalerrietan, eskola-kiroleko entrenamenduak egin ahal izango dira, eta gehienez ere sei laguneko taldetan antolatuta. Taldea beti pertsona berek osatuko dute, eta ezingo dira aldagelak erabili. Eskola-kirolean maskara erabiltzea nahitaezkoa da, bai aire zabaleko kirol-jardueretan, bai barruko esparruetan. Igerilekuetan eta kanpoan egiten diren jarduera fisiko aparteko uneetan baino ez dira kenduko.
Baimenduta al daude eskola kiroleko lehiaketak?
Ez.
Taldean kirola egin dezaket?
COVID-19aren kasu positiboen azken 14 egunetako intzidentzia-tasa metatua 100.000 biztanleko 500 baino gutxiagokoa duten udalerrietan, federatu gabeko kirol-jarduera fisikoa bakarka edo taldeka egin ahal izango da aire zabalean, kontaktu fisikorik gabe, eta aldi berean 6 laguneko taldeetan, gehienez ere.
COVID-19aren kasu positiboen azken 14 egunetako intzidentzia-tasa metatua 100.000 biztanleko 500 edo gehiagokoa duten udalerrietan, bertan behera geratzen da taldeko kirol-jarduera oro, bai entrenamenduan, bai lehiaketan. Salbuetsita daude, eta, beraz, egin ahal izango dira lehiaketa profesionalean edo erdi-profesionalean murgilduta dauden taldeen entrenamenduak eta kirol-lehiaketak, gimnasioetan, kirol-klubetan edo kiroldegietan programatutako ikastaroak edo jarduerak, eta jarduera fisikoa eta kiroljarduera, aire zabalean eta gehienez sei laguneko taldeetan.
Irten al daiteke korrika egitera edo bizikletan taldean ibiltzera?
Federatu gabeko kirol-jarduera fisikoa bakarka edo taldeka egin ahal izango da aire zabalean, kontaktu fisikorik gabe, eta aldi berean 6 laguneko taldeetan, gehienez ere.
Aldagelak eta dutxa-guneak erabil daitezke?
Bai, gehieneko edukieraren ehuneko 30eko okupazioarekin. Halaber, dutxak erabili ahal izango dira, baldin eta banaka erabiltzen badira. Maskara nahitaez erabili beharko da, dutxatzeko unean izan ezik, eta une oro errespetatuko da erabiltzaileen arteko segurtasun-distantzia. Aldagelak etengabe aireztatu beharko dira erabiltzen diren bitartean eta, gainera, ireki aurretik eta itxi ondoren. Aireztapena mekanikoa bada, kanpoko airearen sarrera maximizatu beharko da eta airearen birzirkulazioa saihestu.
Derrigorra al da maskara erabiltzea barruko jardueretan?
Bai.
Derrigorra al da maskara erabiltzea kanpoko jardueretan?
Bai, salbuespen batzuekin. Maskara ken daiteke eremu naturaletan, herrigunetik kanpokoetan —oinezkorik ez bada—, igerilekuetan, lehiaketa profesional eta erdi-profesionaleko entrenamendu eta lehiaketetan eta kanpoan egiten den jarduera fisiko biziko jakineko momentuetan.
Publiko gisa joan daiteke kirol ekitaldi batera?
Ez.
Kirolari federatu bat lehiatu daiteke?
COVID-19aren kasu positiboen azken 14 egunetako intzidentzia-tasa metatua 100.000 biztanleko 500 baino gutxiagokoa duten udalerrietan, lehiaketa profesionalean eta federatuan murgilduta dauden taldeen entrenamenduak eta kirol-lehiaketak egin ahal izango dira. COVID-19aren kasu positiboen azken 14 egunetako intzidentzia-tasa metatua 100.000 biztanleko 500 edo gehiagokoa duten udalerrietan lehiaketa profesionalean edo erdiprofesionalean murgilduta dauden taldeen entrenamenduak eta kirol-lehiaketak egin ahal izango dira bakarrik.
Zer ulertzen dugu kirolari erdi profesional diogunean?
Egutegi ofizialeko Estatuko eta nazioarteko lehiaketetan eta Euskal Federazioak antolatutako maila goreneko lehiaketetan parte hartzen duten kirolariak dira, guztiak kategoria absolutuan, Eta Estatuko edo nazioarteko lehiaketetan dagokien kategoria absolutua baino beheragoko kategorian. Atal honetan kategoria absolutuko maila goreneko bertoko kirol-lehiaketak sartzen dira.
Gimnasio bateko makina-gelan kirola egin dezaket?
Bai, banaka, maskara erabiliz, segurtasun-distantzia mantenduz eta baimendutako gehieneko edukiera errespetatuz.
Eskolak edo jarduerak taldean eskain daitezke?
Gimnasioetan, kirol-klubetan, igerilekuetan eta kiroldegietan programatutako ikastaroak edo jarduerak bakarrik egin ahal izango dira, baldin eta maskara erabiliz egiten badira, kanpoan egiten diren jarduera fisiko aparteko uneetan izan ezik. 6 pertsonako taldeetan gehienez, eta edukiera ehuneko 50era mugatuta badago.
Baimenduta al dago ehiza-jarduera bere modalitate guztietan, bai eta ibaiko eta itsasoko arrantza, kirol-arrantza eta jolas-arrantza ere, modalitate guztietan?
Bai, bizi zaren udalerrian. Nolanahi ere, beti errespetatu behar da pertsonen arteko 1,5 metroko segurtasun-distantzia, eta nahitaezkoa da maskara erabiltzea.
Musika tadeek eta abesbatzek entseguak egin al ditzakete?
Profesionalek eta hezkuntza arautuan daudenek bakarrik.
Dantza taldeek entseguak egin al ditzakete?
Bai, maskara jantzita, sei laguneko taldeetan eta kontaktu fisikorik gabe egitekotan.
Zer edukiera errespetatu behar dute saltokiek?
150 metro koadrora arteko establezimenduetan ezingo da edukieraren %60 gainditu; hortik gorakoetan ezingo da edukieraren %40 gainditu.
Saltokiek zer ordutegitan sal dezakete alkohola?
08:00etatik 21:00era artean.
Edan daiteke alkohola kalean?
Ez.
Erre daiteke kalean?
Besteekiko bi metroko gutxieneko distantzia mantendu daitekeenean bakarrik.