Errigoraren kanpainan batzen duten diruaren parte bat Nafarroa hegoaldeko euskalgintzarentzat izango da, beti bezala. Otsailaren 27tik martxoaren 12ra arteko epea izango da eskaerak egiteko, Errigoraren webgunearen bidez: www.errigora.eus
Kanpaina honetako eskaintzaren barruan honako produktu hauek egongo dira aukeran: oliba-olio birjina estra, pikillo piperrak, zainzuri zuriak, orburuak, barazki-menestra, tomate frijitua, arroza, potxak, barazki-kremak eta pasta. Aurtengo kanpainan 16 ekoizlek hartuko dute parte: Nafarroa hegoalde eta erdialde zabaleko bost olio-errotak, bederatzi kontserba-etxek eta arroz-ekoizle eta pastagile banak. Urtez urte, kontsumitzaileen kopuruarekin batera, ekoizleen familia ere haziz doa.
'Gure hautuez harro' da aurtengo kanpainaren leloa. "Harro baikaude gure ekoizteko eraz, gure kontsumitzeko eraz, herria egiteko eraz", adierazi dute Errigorakoek.