San Bartolome jaietan jarri zuten markagailua urte guztirako egongo da Merkatu plazako eraikinean. Jarri zuten egunerako, eta Gobernu Ordezkaritzaren erregistro ofizialaren arabera, 40 ziren gizonek (izan bikotekide nahiz bikotekide ohiak) estatu espainiarrean hil zituzten emakumeak, baina Feminicios.net webgunearen arabera, kopurua handiagoa da. Izan ere, Gobernu Ordezkaritzaren erregistro ofizialean kontuan hartzeko, beharrezkoa da emakumeek eta haien hiltzaileek harreman sentimentalen bat mantentzea edo noizbait izan izana. Hiltzailearen eta biktimaren artean harreman sentimentalik egon ez bada edo egon dela frogatu ezin bada, zerrenda horretatik kanpo gelditzen dira.