Gure Balioak saria jaso zuen atzo Felix Etxeberria Parapanek, Mendaroko San Agustin kultugunean egin zuten ekitaldian. Ibilbide oso baten aitortza izan zen. Epaimahaiak Etxeberriaren "ekimena eta izaera ekintzailea" nabarmendu zituen, eta baita haren "zintzotasuna, ausardia eta ekimen berriei egiteko ilusioa" ere. Felixek berak esker on hitzak izan zituen ibilbide osoan aliatu izan dituen lagunentzat, eta bereziki, Loli Canales emaztearentzat.
Juan, Nerea eta Maddi Arriola aita-alabek hasi zuten ekitaldia, biolin emanaldiarekin. Ondoren, Maite Maiora mendiko korrikalariak kirolaren balioez hitz egin zuen. Taldetasuna, konpromisoa, konfiantza, ausardia, ahalegina eta ekiteko ilusioa aipatu zituen, besteak beste, baloreen artean, eta horiek eta gehiago aitortu zizkioten ondoren Felix Etxeberria eguneko protagonistari. Haren ibilbidea laburtzen duen bideo bat ere jarri zuten (beherago duzue ikusgai), Etxeberriaren bultzada izan duten elkarte eta erakundeetako ordezkarien lekukotzekin, eta Parapan zerbait bada, euskaltzale amorratua eta ekintzaile saiatua dela nabarmendu zuten. Ekitaldia, 'Xalbadorren heriotzean' kantuarekin itxi zuten Arriola aita-alabek.
Felix Etxeberriaren ibilbidea, bideoan:
Gure Balioak Saria Debegesa garapen agentziak sortu zuen 2010ean eta urtero banatu izan da. Aurreko edizioetan saridunak hauexek izan dira:
- 2016: Nerea del Campo Agirre
- 2015: Antonio Cancelo Alonso
- 2014: Sabin Osoro Unzueta
- 2013: Carmelo Urdangarin Altuna
- 2012: Jesus Bilbao Azpiri
- 2011: Gemma Aguirregomezkorta Laka
- 2010: Mª Tere Ganchegui Juaristi
