Mauxitxa txarangak urtero irailaren 1ean egiten duen kalejira berezia egin du gaur ere. Ohi duten legez, oraindik eguna argitu gabe zela, 7:00etan puntuan, hasi dute Lanerako diana.

Duela 40 urte inguru hasitako ohiturari eutsi diote aurten ere Mauxitxa txarangakoek, eta Kalejiran ibili dira Elgoibarko kaleetan barrena. Txiki Egunean baino jarraitzaile gutxigo izan dituzten arren, amaierarako jende dexente batu da segiziora. Izan ere, lan eguna da gaur, opor osteko lehenengoa askorentzat, eta horrexegatik irteten dira egun seinalatu honetan, irailaren 1ean, kalejiran. Hainbat lagunentzat lanera bueltatzeko eguna izango dena umore onean hasteko, alegia.