Javier Nuñezen esanetan, ongizate estatua hobetzea du helburu Laguntza Justuagoak plataformak. 30.000 sinadura lortuta, parlamentura jo ahalko dute, legea aldatzeko eskatzera. “Laguntzak benetan beharra duten pertsonengana iritsi daitezela nahi dugu, eta horretarako ezinbestekoa da gure poltsikoetatik irteten den dirua zorroztasunez banatuko duen sistema bat edukitzea”. Bere ustez, indarrean dagoen legeak ez ditu baldintza horiek betetzen. “Denok ezagutzen ditugu sistemak huts egiten duela agerian uzten duten kasuak, eta hala egiaztatu da azkenaldian ere. Esaterako, hor dago hamar laguntza aldi berean kobratzen ari den lagunaren kasua”.
Nuñezek azaldu duenez, plataforma ez dute inoren kontra egiteko sortu, indarrean dagoen legea “hobetzeko” baizik. Jasotako kritikei ere erantzun die Nuñezek. “Arrazistatzak jotzen gaituztenak demagogia egiten ari dira, eta gainera, eurak dira gehiegikeriak gertatzearen erantzuleak, ez ikusiarena egiten baitute arazo honen aurrean. Laguntza sozialak denok ordaintzen ditugun zergekin eusten direla ahazten dute”.