Gipuzkoako Foru Aldundiak jakinarazi duenez, inoizko parte-hartze prozesu zabalena egin du azken urte eta erdian eskualde gehienetan autobus zerbitzuak berritzeko, eta parte-hartze prozesu horretan ekarpen eta iritzi asko jaso zituzten: 5.000 ekarpen baino gehiago. Horietako asko, ekarpenen %75 inguru, kontuan hartu dituztela azaldu dute. Orain zerbitzu berriak martxan jartzeko garaia iritsi da. Tolosaldeko zerbitzu berriak abenduan jarri ziren martxan, eta Debagoienakoak, Debabarrenakoak, Urola Erdikoak eta Urola Kostakoak martxoaren 1ean jarriko dituzte martxan. Aldundiaren esanetan, autobus zerbitzu berrietan %36 gehiago inbertituko du. Lineek beteko dituzten kilometro kopurua ere handitu egin da (16 milioi kilometro 2014an eta 22 milioi kilometro 2015ean), eta 99 gidari gehiago arituko dira (555 gidari ziren 2014an eta 654 dira 2015ean).
• Debabarrenan 12 linea
Hamabi linea arrunt eta gaueko bi izango ditu Lurraldebusek aurrerantzean Debabarrenan. Linea nagusiak 6:00etatik 22:00ak arte egongo dira martxan lanegunetan, eta barixakuetan gaueko azken autobusak 01:00etan jarri dira hainbat kasutan. Era berean, Mendaroko ospitaletara konexioak hobetu egin dira, eta Debagoienara eta Urola Erdira lotura hobetu egingo da.
∞Lotura duten albisteak:
- Autobus zerbitzua hobetzeko batzarra egingo dute gaur Elgoibarren (2014-04-10)
- Autobus zerbitzua berritzeko proposamenaren gainean bilerak egingo dituzte Mendaron eta Elgoibarren (2014-03-19)
- 23 lagunek parte hartu zuten autobus zerbitzua hobetzeko bileran (2013-11-18)
- Autobus zerbitzua hobetzeko bilera antolatu dute Elgoibarren, astelehenerako (2013-11-08)